Stationery Card

Little Birthday Girl Birthday Invitation

Party invitations and announcements for college graduates.

View the entire collection of cards.

Anghel ng Buhay

Malugod kong ipinakikilala ang anghel ng aking buhay. Siya ang dahilan kung bakit ako parating nakangiti at masaya kahit na naninirahan sa dayuhang bansa at malayo sa piling ng pamilya at mga kaibigan.

Hindi ko ipagkakaila na bago ako magkaroon ng sarili kong supling ay sadyang wala akong kahilig hilig sa mga bata. Nagkaroon nga ng punto sa aking buhay na ayaw kong magkaroon ng anak sapagkat hindi talaga ako mahilig sa bata ngunit sa muling pagsabay ko sa agos ng aking buhay, ako'y binayayaan ng isang munting sanggol. Nakakagulat ang lahat ng pagbabagong naganap sa aking buhay at pati na rin ang pagbabago sa aking katauhan. Maliit man siya'y animo'y higante siyang biglang pumasok sa buhay naming mag-asawa at lahat ng dating nakagisnan ay tuluyan na nga naming nilimot.

Francesca Isabelle

Talaga namang marami ng pagbabago sa aking buhay simula ng una kong simulan itong aking blog. Ngayon ay may hinihintay na akong supling na magiging bahagi na ng aming buhay...

Banyuhay

Talagang hindi mo masasabi kung saan ka dadalhin ng agos ng buhay. Hindi kailanman pumasok sa aking isipan na ako ay maninirahan sa dayuhang bansa pero eto ako ngayon, residente ng bansang Canada.

Napakaraming pagbabago sa aking buhay simula ng ako ay dumating dito. Bagong kultura, bagong klima...bagong ilog na naman na aking tatahakin sa pagdaloy ng aking buhay.

Pasahero

Sa pag-agos ng ilog parati itong may patutunguhan. Alam ng ilog ang kanyang dadaanan at lalagusan.

Sa iyong pagsabay sa agos ng ilog mo lamang matututunan kung saan ka nito dadalhin.

KASAL

Maraming beses ko ng naisulat ang aking mga ginawang paghahanda para sa aking kasal...

Nagpaikot ikot ako kasama ng aking magiging asawa sa kung saan saan para lamang makahanap ng simbahan at venue na pagdadausan nito. Ilang araw, linggo't buwan ang aking ginugol para rito. Makalipas ang matagal na panahon (tatlong taon rin halos!) ay tila di na muling nabanggit pa ang ukol sa kasalan. Di ko na rin napagtuunan ng pansin ang paghahanda dahil sa mga pangyayaring sadyang nagbago sa ihip....agos ng aking buhay, ang aming pangingibang bansa.

Pero sabi nga ng marami, sa pinagkahaba haba man ng prusisyon, sa awa at gabay ng Diyos, sa kasal pa rin naman kami humantong. Kasama ng mga mahal ko sa buhay, natupad din ang aking pinakamimithing araw. Isang simpleng okasyon na dinaluhan ng mga pinakamalalapit na tao sa aking buhay.

Talagang mabait ang Diyos. Tunay na ipinagkaloob niya sa akin ang isang mabuting lalaki na magiging katuwang ko sa panghabambuhay. Isang kaibigan na makakasama sa aming pagsisimula ng bagong buhay sa Canada.

Salamat po Panginoon...maraming maraming salamat.

bilang na ang aking araw...

ilang araw na lang...malapit na malapit na talaga. hindi ako makapaniwala na talagang matutuloy na ang aming pangingibang bansa.

sabi ng ng isa kong malapit na kaibigan, "its ironic" na ako pa ngayon ang aalis ng bansa... ako na kilalang makabayan at tutol sa pangingibang bansa.

isa lang ang sagot ko sa kanya...

life happens.

maraming mga bagay sa buhay na magtutulak sa iyong umiba ng landas. hindi mo talaga maipaplano ang lahat ng gusto mong mangyari...minsan ay kailangan mong bumitaw at hayaan magpadala.

pero pakatandaan, hindi ibig sabihin nito'y nabawasan ang pagmamahal ko sa aking bayan.